నువ్వు దొరకడమే నా అదృష్టం చరణ్ బాబు.. చిరంజీవి భావోద్వేగ పోస్ట్

తనయుడు రామ్ చరణ్ పంపిన పుట్టినరోజు శుభాకాంక్షలకు మెగాస్టార్ చిరంజీవి భావోద్వేగానికి గురయ్యారు. చరణ్ మాటలు తన హృదయాన్ని గర్వంతో, ఆనందంతో నింపేశాయని, అంతకంటే గొప్ప బహుమతి మరొకటి ఉండదని ఆయన బదులిచ్చారు. వీరిద్దరి మధ్య సోషల్ మీడియా వేదికగా జరిగిన ఈ ఎమోషనల్ సంభాషణ అభిమానులను ఎంతగానో ఆకట్టుకుంటోంది.

నిన్న తన 70వ పుట్టినరోజు వేడుకలను కుటుంబ సభ్యుల మధ్య జరుపుకున్న చిరంజీవికి రామ్ చరణ్ ప్రత్యేకంగా శుభాకాంక్షలు తెలిపారు. తండ్రి పాదాలకు నమస్కరించి ఆయన ఆశీర్వాదం తీసుకున్నారు. ఇందుకు సంబంధించిన వీడియోను చరణ్ సోషల్ మీడియాలో పంచుకున్నారు. అందులో చిరంజీవి కేక్ కట్ చేసి చరణ్‌కు తినిపించడం, ఆ తర్వాత చరణ్ ఆయన్ను ఆలింగనం చేసుకోవడం వంటి దృశ్యాలు ఉన్నాయి.

అంతకుముందు, తన తండ్రిని ఉద్దేశించి చరణ్ ఒక హృదయపూర్వకమైన పోస్ట్ పెట్టారు. "నాన్నా, ఇది కేవలం మీ పుట్టినరోజు కాదు, మీలాంటి అద్భుతమైన వ్యక్తికి ఇది ఒక వేడుక. నా హీరో, నా మార్గదర్శి, నా స్ఫూర్తి మీరే. నేను సాధించిన ప్రతి విజయం, నేను పాటిస్తున్న ప్రతి విలువ మీ నుంచే వచ్చాయి. 70 ఏళ్ల వయసులో మీరు మనసులో మరింత యవ్వనంగా, స్ఫూర్తిదాయకంగా మారుతున్నారు" అని చరణ్ పేర్కొన్నారు. 

చరణ్ పోస్ట్‌కు స్పందించిన చిరంజీవి.. "నా ప్రియమైన చరణ్ బాబు, నీ మాటలు చదువుతుంటే నా హృదయం గర్వంతో, ఆనందంతో నిండిపోతోంది. నువ్వు ఇంత బాధ్యతగల, ఆలోచనాపరుడైన వ్యక్తిగా ఎదగడం చూడటమే నేను కోరుకోగల గొప్ప బహుమతి. నన్ను ఎప్పుడూ ఇంత ప్రత్యేకంగా భావించేలా చేస్తున్నందుకు ధన్యవాదాలు. లవ్ యూ" అంటూ బదులిచ్చారు. ప్ర‌స్తుతం ఈ తండ్రీకొడుకుల ప్రేమపూర్వక సంభాషణ సోషల్ మీడియాలో వైరల్‌గా మారింది.